នៅសួនផ្កា

បុស្បា      នៅសួនផ្កាត្រជាក់ស្រួលដល់ហើយ។

តារា        ខ្ញុំចូលចិត្តមកទីនេះពេលទំនេរពីការងារ។

បុស្បា      មកទីនេះមើលផ្កាមែន?

តារា        ហ្នឹងហើយ មកស្រូបក្លិនផ្កា។

បុស្បា      តារាចូលចិត្តផ្កាអ្វីដែរ?

តារា        ខ្ញុំចូលចិត្តផ្កាម្លិះ និងផ្ការំដួល។

បុស្បា      មានដាំផ្កាម្លិះ និងរំដួលនៅផ្ទះទេ?

តារា        បាទ មាន ខ្ញុំដាំម្លិះនៅមុខផ្ទះ ឯរំដួលនៅខាងក្រោយផ្ទះ 

              តែរំដួលមិនទានមានផ្កាទេ មានតែម្លិះប៉ុណ្ណោះ។

បុស្បា      ផ្ទះខ្ញុំមានម្លិះដែរ ខ្ញុំដាំផ្កាច្រើន។

តារា        មានច្រើនដូចនៅសួននេះដែរ?

បុស្បា      មិនច្រើនដូចសួនហ្នឹងទេ។ ផ្កានៅសួននេះ មានផ្កាខ្លះ 

              ខ្ញុំមិនស្គាល់ទេ។ តារាស្គាល់ផ្កាអីខ្លះ ជួយប្រាប់ខ្ញុំផង។

តារា        នេះគេហៅថាផ្កានួនស្រី មួយនេះគឺផ្កាមាលតី មួយនេះ

              ផ្កាសិរមាន់បុស្បាស្គាល់ហើយ ឯខាងនេះគឺផ្កាណាគ្រី។

បុស្បា      ហើយចុះមួយនោះវិញ?

តារា        ហ្នឹងគេហៅផ្កាក្ដាងងា ផ្កានេះក្រអូបឈ្ងុយដូចចេកទុំអីចឹង។ 

              នៅសួននេះគេមិនដាំក្រវាន់ទេ តែមានរំដួល។ ក្រវាន់ 

              និងរំដួលផ្កាដូចគ្នា ក្លិនដូចគ្នា។

បុស្បា      ផ្ទះខ្ញុំមានផ្ការំយោល ចំប៉ី ចម្ប៉ា ស្បៃរឿង ដកគាំ 

              សារិកាកែវ ផ្កាក្រដាស បើផ្កាម៉ោងដប់សំបូរជាងគេ។

តារា        ចុះមានដាំផ្កាយិតថូទេ?

បុស្បា      មិនមានទេ។

តារា        នេះគឺផ្កាយិតថូហើយ ឯខាងនោះគឺផ្កាទូហូ។

បុស្បា      ចុះខាងនោះវិញ?

តារា        អូរដើមធំនោះ គេហៅសាលព្រឹក្ស។ សាលព្រឹក្សហ្នឹង

              គេច្រើដាំនៅតាមវត្តអារាម។

បុស្បា      អរគុណណាស់តារា ដែលបានណែនាំអោយស្គាល់ផ្កា

              មួយចំនួន។ ពេលទំនេរ ខ្ញុំរកទិញពូជផ្កាទាំងនេះយក

              ទៅដាំនៅផ្ទះមិនខាន។

តារា        មិនអីទេ បើត្រូវការអោយខ្ញុំជួយ ប្រាប់មកចុះ។

Homework K1

I. Read words below

II. Translate words below

១. ញើស     តូច         កូន          តែងតាំង    ដឹក

២. ងងឹត    ចំអាម       ដែក         ចេក         ខោ

៣. ​ដុំ        ជីតា          ឆាប         គោក       ដឹកនាំ 

៤. ចៃ       ដី              ជីវិត         ខំ            តា

៥. ការងារ   ថែម        តឹង           ជជុះ         ឈូក 

៦. ដើម     ញឹក         ដូច           ងងុយ       ចុះ

៧. ចោត    ដែក         ចៅ           ដូង           ជាតិ 

៨. ឈឺ        ជើង         កំពូល       ខាំ            តួ

៩. ឈើ      ចៀន       ដូច           ថែម          កុលាប     

១០. ជាំ     ខូច           ថូ             គីឡូ         កៅអី

១១. គំរូ     តិច           ខឹង           ថវិកា        ជំនួយ 

១២. គោ      ដីស         ខើច         តឿ           គូស

១៣. ចាំ       តិច            ដេក        គីមី           កាត

១៤. ដឹង       គុក           ខាត         តែ            ងូត

១៥. គូស       ខួច           ថា            ជី             តែម

១៦. ថើប      តឿ           ដដែល      ដំ​         កកាយ 

១៧. ថៃ        គាប          ខូង          ដូរ            តុកកែ

១៨. ចាន       ឆៅ       ចរាចរ       ចាប         ថោះ

១៩. ដី          កុំ        ចុងភៅ      ខុស             គោលដៅ

២០. ខួរ        គោះ         ងំ             ថោក        ឆោត

ទៅលេងសមុត្រ

បុស្បា       តារាចូលចិត្តទីនេះទេ?

តារា        បាទខ្ញុំចូលចិត្តមាត់សមុត្រណាស់ ព្រោះបានស្រូប

               យកខ្យល់បរិសុទ្ធ។ បុស្បាឧស្សាហ៍មកលេងទេ?

បុស្បា      ខ្ញុំមិនសូវបានមកលេងទេ ដោយសាររវល់នឹងការងារពេក

               តែតែងតែមកលេងនៅថ្ងៃបុណ្យសិទ្ធិនារីរាល់ឆ្នាំ។

តារា        បុស្បាដែលបានឆ្លងទៅកម្សាន្តនៅកោះទេ?

បុស្បា      ខ្ញុំមិនដែលបានទៅលេងទេ ព្រោះមិនដែលមាន

               អ្នកណែនាំអោយទៅលេងកោះសោះ។

តារា        ខ្ញុំធ្លាប់ទៅលេង កាលពីឆ្នាំមុន ខ្ញុំចូលចិត្តទីនោះដែរ

               តែត្រូវចំណាយច្រើនបន្ដិច។

បុស្បា      អីចឹងចាំសន្សំលុយបានសិន ចាំទៅលេងម្ដង។ តារាចង់

               ញ៉ាំអីដែ មានមឹកអាំង យីហ៊ឺ ឬយើងចាំទៅញ៉ាំនៅក្នុង

               ភោជនីយដ្ឋានវិញ។

តារា        ខ្ញុំចង់ភ្លក្សមឹកអាំងទីនេះសិន ចាំយប់យើងទៅញ៉ាំ

              ស៊ុបទៀត។

បុស្បា      អីចឹងក៏បាន ខ្ញុំហៅមឹក១០ចង្កាក់សិន។

តារា        អរគុណ។

បុស្បា      រសជាតិម៉េចដែរមឹកអាំងហ្នឹង?

តារា        ឆ្ងាញ់ណាស់ ខានញ៉ាំយូរហើយ។

បុស្បា      តារាចង់ញ៉ាំទឹកដូង ឬទឹកអ្វី?

តារា        មិនអីទេ ចាំខ្ញុំហៅទឹកដូងខ្លួនឯងណា៎។   

បុស្បា      តាមចិត្ត។ តែហៅទឹកសុទ្ធអោយខ្ញុំផង។

តារា        បាទ ចាំខ្ញុំហៅអោយ។ បុស្បាប្រយ័ត្នផង ក្រែងខ្សាច់

               ចូលភ្នែក។

បុស្បា      ចាស អរគុណ។

តារា        បុស្បាមិនមុជទឹកសមុត្រទេអី?

បុស្បា      ចាំអោយត្រជាក់បន្ដិចសិន ខ្ញុំមិនទាន់មុជឥឡូវទេ។

តារា        ត្រូវហើយ ឥឡូវថ្ងៃក្ដៅណាស់។ បុស្បាមានថ្នាំ

               លាបការពារកំដៅថ្ងៃទេ?

បុស្បា      ចាស ខ្ញុំមាន តារាត្រូវការទេ?

តារា        អោយខ្ញុំសុំបន្ដិចមក។ អរគុណ។

បុស្បា       តារាជួយបង្ខិតឆ័ត្របន្តិចមក កុំអោយពន្លឺថ្ងៃជះចំពេក។

តារា         បាទ ចាំខ្ញុំធ្វើ។

បុស្បា       មានអ្នកមកលេងច្រើនណាស់ថ្ងៃនេះ។

តារា         ព្រោះជាថ្ងៃសម្រាកពីការងារ ទើបមានអ្នកមកលេងច្រើន។

បុស្បា       តារាមើលរលកសមុត្រមានធំមានតូច ស្អាតណាស់។

តារា         បុស្បាឃើញកូនទូករបស់អ្នកនេសាទទេ?

បុស្បា       ចាសឃើញ លិចងើបៗ កោតតែគេហ៊ានបើកទូក

               នៅសមុត្រ។

តារា         ល្ងាចបន្ដិចអ្នកនេសាទនឹងយកបង្កង ត្រី ក្ដាម មឹក

               ស្រស់ៗមកលក់នៅផែមិនខាន។

បុស្បា       ខ្ញុំចង់ទៅមើល។

តារា         ចាំខ្ញុំនាំទៅ។

នៅព្រលានយន្តហោះ

តារា         សួស្ដីបុស្បា!

បុស្បា       ចាសសួស្ដី ជួបគ្នាទៀតហើយ។ តារាចេញទៅ

               ប្រទេសណាដែរ?

តារា         បាទ ខ្ញុំទៅប្រទេសជប៉ុន។ ចុះបុស្បាវិញទៅណាដែរ?

បុស្បា       ខ្ញុំទៅស៊ុយអែត។

តារា         ទៅរៀនមែនទេ?

បុស្បា       អត់ទេ។ ខ្ញុំទៅចូលរួមសិក្ខាសាលាទេតើ។

តារា         ទៅប៉ុន្មាននាក់ដែរ?

បុស្បា       ទៅតែម្នាក់ឯងហ្នឹងណា។ ចុះតារាទៅដើរលេងមែន?

តារា         ខ្ញុំទៅរៀន តែរយៈពេលខ្លីដែរទេ។ ទៅអឺរ៉ុប

               ពិបាកធ្វើវីសារទេ?

បុស្បា       ពិបាកដែរ ព្រោះត្រូវបំពេញក្រដាសស្នាមច្រើន។

តារា         ឯខ្ញុំមិនសូវពិបាកទេ។ ខ្ញុំឮគេថាសុំទៅអឺរ៉ុប ស្ថានទូត

               ទាមទារឯកសារច្រើន ដូចទៅអាមេរិកដែរ។

បុស្បា       តាមខ្ញុំដឹង ការសុំទិដ្ឋាការទៅអាមេរិកពិបាកជាងទៅ

               ប្រទេសផ្សេងៗទៀត។

តារា         មែនហើយ។ កាលម៉ាក់សុំទៅអាមេរិក គាត់រអ៊ូមិនឈប់។

បុស្បា       តារាឯងចូលថ្លឹងឥវ៉ាន់ហើយនៅ?

តារា         នៅទេ ប្រហែលកន្លះម៉ោងទៀតមើលទៅ។

បុស្បា       ខ្ញុំទើបតែថ្លឹងឥវ៉ាន់រួចមុននេះបន្តិចហ្នឹង។

តារា         ចឹងជិតដល់ពេលចូលទៅក្នុងបន្ទប់រង់ចាំហើយ។

បុស្បា       គេអោយចូលហើយ តែខ្ញុំចង់រកអីញ៉ាំនៅខាងក្រៅសិន។

តារា         ចង់ញ៉ាំអីដែរ ខ្ញុំកំដរក៏បាន។

បុស្បា       មិនអីទេ ប្រយ័ត្នហួសម៉ោងថ្លឹងអីវ៉ាន់។

តារា         តែខ្ញុំគិតថាមិនអីទេ គ្រាន់តែជូនបុស្បាទៅរកអីញ៉ាំនោះ។

បុស្បា       នៅខាងក្រៅមានលក់ភីហ្សា តែបើឆ្លងផ្លូវមាន

               ហាងលក់បាយ  លក់គុយទាវ។  

តារា         បុស្បាចង់ញ៉ាំអីដែរ?

បុស្បា       ខ្ញុំចង់ញ៉ាំបាយ ចុះតារាវិញ?

តារា         ខ្ញុំអីក៏បាន។

បុស្បា       អីចឹងតោះយើងឆ្លងផ្លូវទៅរកអីញ៉ាំ។

តារា         និយាយអីចឹង ពលណាបុស្បាត្រលប់មកវិញ។

បុស្បា       ខ្ញុំទៅតែបីសប្ដាហ៍ទេ។ ចុះតារាវិញអង្កាលមកវិញដែរ?

តារា         ខ្ញុំទៅបីខែ បន្ទាប់ពីចប់វគ្គហ្នឹង បើខ្ញុំចង់រៀនបន្ត

               គេអោយបន្តបានរហូតដល់មួយឆ្នាំ។

បុស្បា       តារាចង់បន្ដទេ?

តារា         ខ្ញុំមិនមានមានគម្រោងបន្តទេ ព្រោះបើម៉ាក់មក

               លេងស្រុកខ្មែរ ខ្ញុំត្រូវមកទទួលគាត់។

បុស្បា       អ្នកមីងមានគម្រោងមកអង្កាលដែរ?

តារា         ម៉ាក់រង់ចាំសំបុត្រស្នាមរបស់គាត់ធ្លាក់មកសិន។

បុស្បា       តារា ខ្ញុំសុំប្ដូរមិនទៅញ៉ាំបាយវិញបានទេ?

តារា         បានតើ តែប្រយ័ត្នឃ្លានណា។

បុស្បា       យើងអាចទិញភីហ្សាញ៉ាំក៏បាន។

តារា         ខ្ញុំអីក៏បាន។

បុស្បា       ព្រោះខ្ញុំមិនចង់អោយតារាឯងមានការខកខានទេ។

តារា         តោះប្រញាប់ទៅយើង។