ការសន្ទនារវាងណាវី និងបូណា

 ការទៅលេងបុណ្យចូលឆ្នាំខ្មែរ នៅទីក្រុងឡូវែល រដ្ឋម៉ាសាឈូសិត

ណាវី: សួស្ដីឆ្នាំថ្មី បូណា។

បូណា: សួស្ដីឆ្នាំថ្មី ណាវី។

ណាវី: បូណា! តើឯងបានទៅលេងបុណ្យចូលឆ្នាំខ្មែរ នៅទីក្រុងឡូវែល រដ្ឋម៉ាសាឈូសិតទេ?

បូណា: បាទ! ខ្ញុំបានទៅហើយ។ គួរឱ្យចាប់អារម្មណ៍ណាស់។

ណាវី: ពិតមែនឬ? តើមានសកម្មភាពអ្វីខ្លះដែលឯងបានឃើញ?

បូណា: នៅទីនោះ មានលេងល្បែងប្រជាប្រិយ ដូចជាលេងឈូង លេងអង្គុញ ទាញព្រ័ត្រ លាក់កន្សែង ដណ្ដើមស្លឹកឈើ។ល។

ណាវី: ស្ដាប់ទៅសប្បាយមែនតើ។ ចុះឯងបានរាំលេងទេ?

បូណា: បាទ! ខ្ញុំបានរាំ ហើយរាំច្រើនបទទៀតផង។

ណាវី: ខ្ញុំចង់ទៅដល់ហើយ។

បូណា: ពិតណាស់ ទៅលេងបុណ្យនៅក្រុងឡូវែល នាំអោយខ្ញុំនឹកដល់ស្រុកខ្មែរណាស់។

ណាវី: សប្បាយជាងគេ គឺបានរាំ បានលេង ហើយចុះបានញ៉ាំម្ហូបខ្មែរទេ?

បូណា: ញ៉ាំ ហើយញ៉ាំច្រើនទៀតផង!

ណាវី: ប្រាប់ខ្ញុំផងមើល បានញ៉ាំម្ហូបអីខ្លះ?

បូណា: ខ្ញុំមានសាច់គោអាំង មានគុយទាវ ដល់រសៀលបន្ដិចញ៉ាំនំបញ្ចុកទៀត។ ទីក្រុងឡូវែលសំបូរម្ហូបខ្មេរណាស់ ចង់ញ៉ាំអីក៏មានដែរ។

ណាវី: គ្រាន់តែស្ដាប់បូណាឯងរ៉ាយរ៉ាប់ក៏ចង់ទៅឃើញដែរ។

បូណា: បាទ! មានមនុស្សម្នាច្រើនណាស់ ចូលរួមលេងកម្សាន្ដ។

ណាវី: បូណាឯងសំណាងហើយ បានទៅលេងចូលឆ្នាំនៅក្រុងឡូវែល។

បូណា: តែខ្ញុំរាងឈឺខ្នងបន្តិច ព្រោះត្រូវគេវាយពេលលេងលាក់កន្សែង ហើយជង្គង់ក៏ឈឺដែរ ដោយសារត្រូវគេជុស។

ណាវី: កុំតំអូញពេក វាគង់តែប៉ុន្មានថ្ងៃទៀតលែងឈឺហើយ។

បូណា: សង្ឃឹមអីចឹងចុះ។ ខ្ញុំនៅតែចង់ទៅលេងឡូវែលទៀត។

ណាវី: បើទៅលើកក្រោយ កុំភ្លេចនាំខ្ញុំទៅផងណា៎។

បូណា: បាទ លើកក្រោយ ខ្ញុំនឹងនាំណាវីទៅជាមួយ។

Khmer New Year 2025

 1. Read the sentences below, then translate them.

2. Translate all the red words into English.

3. Create a new sentence using the red words.

១. តោះយើងនាំគ្នាទៅវត្ត។

២. យើងទៅលេងបុណ្យចូលឆ្នាំខ្មែរនៅវត្តអង្គរ។

៣. ខ្ញុំយកផ្លែឈើទៅវត្ត ដើម្បីប្រគេនព្រះសង្ឃ។

៤. ថ្ងៃនេះខ្ញុំទៅវត្តជាមួយប៉ាម៉ាក់របស់ខ្ញុំ។

៥. យាយសុខ និងតាសៅធ្វើម្ហូបទៅវត្ត។

 

៦. បូណា និងណាវីទៅលេងចូលឆ្នាំនៅសួនច្បារប៉ៃលិន។

៧. ខ្មែរនៅទីក្រុងឡូវែលចូលឆ្នាំនៅថ្ងៃទី១៩ ខែមេសា ឆ្នាំ២០២៥ នៅសួនច្បារប៉ៃលិន។

៨. បូណាទិញសម្លៀកបំពាក់ថ្មីសម្រាប់ពាក់នៅថ្ងៃចូលឆ្នាំ។

៩. ចូលឆ្នាំខ្មែរយើងនាំគ្នាទៅលេងវត្តអង្គរនៅទីក្រុងឡូវែល។

១០. យើងជាជនជាតិខ្មែរ យើងនាំគ្នាប្រារព្ធពិធីបុណ្យចូលឆ្នាំខ្មែរ។

 

១១. ខ្ញុំបានទៅវត្តនៅថ្ងៃចូលឆ្នាំទី១ ហើយថ្ងៃស្អែកខ្ញុំនឹងទៅវត្តទៀត។

១២. នៅវត្តមានម្ហូបខ្មែរច្រើនណាស់។

១៣. ណាវីស្លៀកពាក់សម្លៀកបំពាក់ប្រពៃណីខ្មែរ មើលទៅស្រស់ស្អាតណាស់។

១៤. យើងនាំគ្នារាំលេងនៅថ្ងៃចូលឆ្នាំខ្មែរ។

១៥. យើងនាំគ្នាលេងល្បែងប្រជាប្រិយយ៉ាងរីករាយនៅថ្ងៃចូលឆ្នាំខ្មែរ។

 

១៦. យើងលេងឈូង លេងអង្គុញ លាក់កន្សែង សប្បាយណាស់។

១៧. យើងធ្វើបុណ្យចូលឆ្នាំមួយឆ្នាំម្ដង។

១៨. ម៉ែរៀបចំធូបទៀន ផ្កាភ្ញីទទួលទេវតាឆ្នាំថ្មី។

១៩. យាយសុខរៀបចំផ្លែឈើទទួលទេវតាឆ្នាំថ្មី។

២០. យើងរីករាយឆ្នាំថ្មីទាំងអស់គ្នា។ សួស្ដីឆ្នាំថ្មី។