ក្អែក​គោកត្រាប់តាមក្អែកទឹក

 

      មានក្អែកគោកមួយ  អាស្រ័យនៅតាមដងព្រៃ។  ថ្ងៃមួយក្អែកគោកចេញទៅស្វែងរកចំណី  តាមបឹងឆ្ងាយពីលំនៅខ្លួន។  ក្អែកគោកមានការស្រេកឃ្លានខ្លាំងណាស់  វាហើរបណ្តើរ  ភ្នែករំពៃរកអាហារបណ្តើរ  តែពុំប្រទះសោះ។  វាក៏បន្ទាប់ខ្លួន  ទំលើមែកឈើ  ក្បែរមាត់បឹង។  វាឃើញវ៉ូងក្អែកទឹកនិងស្មោយ  ហែលដេញគ្នាលេង  មុជចាប់ត្រីស៊ីយ៉ាងសប្បាយ។

    ឃើញដូចនេះក្អែកគោកក៏គិតថា៖“ ក្អែកទឹកជាជាតិបក្សី  ពូជក្អែកដូចអញដែរ  ហេតុអ្វីក៏គេចេះហែលទឹកមុជចាប់ត្រីបាន?  ចុះអញ?​  គួរអោយខ្មាស់គេណាស់!​  បើដូច្នេះគួរតែអញចុះមុជចាប់ត្រីសាកល្បងមើល  កុំអោយពួកក្អែកទឹកមើលងាយអញបាន!”។

គិតស្រេច  ក្អែកគោកក៏សម្លបស្លាប  ចុះមុជទឹកចាប់ត្រី  ធ្វើត្រាប់តាមក្អែកទឹក។  បានបន្តិច  ក្អែកគោកក៏មុជទឹកទៅប៉ះសារាយ។  សារាយព័ទ្ធជាប់ស្រោបកាយរុំជុំជិត។  វាខំរើបំរះចុះឡើង  តែពុំរួច  ក៏ឈ្លក់ទឹកស្លាប់កណ្តាលបឹងក្នុងគ្រានោះទៅ៕